Астанада қатты дауыл ғимараттардың шатырын ұшырып әкетті (ВИДЕО)

Астанада кешеден бері қатты дауыл құшағында тұр. Жаңбыр мен қар араласқан жауын-шашыннан кейін қалада қатты дауыл соқты. Соққан желдің күштілігі сондай, ғимараттардың шатыры мен аулалардағы орындықтарды ұшырып әкетті.

Сондай-ақ, әлеуметтік желілерде кейбір қала тұрғындарының желдің екпініне шыдай алмай құлап жатқаны туралы жазбалар тарап жатыр.

Видеода Астанадағы «Северное сияние» тұрғын үй кешеніндегі балалар алаңынан орындықтың ұшып жатқанын көруге болады.

«ҚазАвтоЖол» АҚ мәліметтері бойынша, 6 қазанда қолайсыз ауа райы жағдайларына, қатты жел мен көрінудің нашарлауына байланысты 5 өңірдегі республикалық маңызы бар автожолдардың 10 учаскесінде қозғалыс жабық және шектелген. Нақтырақ айтқанда, Ақтөбе, Ақмола, Қостанай, Жамбыл, Түркістан облыстарында көлік қозғалысы толықтай жабық. 7 қарашада Павлодар мен Щучинск бағытындағы жолдар қайта ашылды.

Қолайсыз ауа-райына байланысты Астанада мектеп оқушылары қашықтан оқу форматына ауысты.

ТЖМ дауылды ескерту кезінде мынадай ережелерді ұсынады:

• алыс сапарларға шықпау;
• ауылдық жерлердің тұрғындары ұзақ жаяу сапарларға шықпау;
• елді мекендерден тыс жерлерге шықпау;
• жол жабылатын жерлерде көлік құралдарын қалдырмау;
• мүмкін болса, елді мекендерде, кемпингтерде немесе жол бойындағы кафелерде болу.