«Қызметтік көлікке отыруды ұсынған»: Астанада полицейлер қызға тиісті деп айыпталды
Полиция департаменті видеоға қатысты түсініктеме берді.
Әлеуметтік желіде Астанада полицейлердің көшеде кетіп бара жатқан қызға “жеткізіп тастайық” деп қызметтік көлікке мінуді ұсынған видеосы пайда болды, - деп жазады sadaqmedia.kz ақпарат порталы.
Желі қолданушылары тәртіп сақшыларын қызға тиісті деп айыптады.
“Астана қаласының полицейлері жолда кетіп бара жатқан қыздардың атын сұрап, көлікке отыруларын ұсынған. Бұл қаншалықты дұрыс? Полиция бізді қорғаудың орнына, өздері тәртіпсіздікке жол береді”, – делінген жазбада.
Астана полиция департаменті видеодағы жағдайды түсіндірді.
"Полиция қызметкерлері көлік жүретін жолдың бойында, жолсыз жерде кетіп бара жатқан қызды көріп, көмек қажет пе деп сұраған. Қажет болған жағдайда, көлікпен тиісті жерге дейін жеткізіп тастайтындарын айтқан. Қыз ұсыныстан бас тартқан. Артынша патрульдік бригада аумақты патрульдеу жұмыстарын жалғастырды", – деп хабарлады полиция департаментінің баспасөз қызметі.
Сіздің реакцияңыз қандай?
