«Перизат Қайрат ұрлық жасап, оқудан шығарылған»: Оқу орындары түсініктеме берді

Cу тасқынынан зардап шеккендерге жиналған 1,5 миллиард теңгені жымқырды деп күдікке ілінген «Biz birgemiz» қорының негізін қалаушы Перизат Қайратты қаралайтын деректер әлеуметтік желіде таралып кетті. Соның бірі – Перизаттың өзі оқыған колледж жатақханасында телефон ұрлап, оқудан шыққаны туралы ақпарат. Stan.kz тілшісі Перизат Қайрат оқыған «Маңғыстау өнер колледжі» мен Эстрада-цирк колледжіне желіде тараған ақпараттың рас-өтірігін анықтау үшін хабарласты. 

«Маңғыстау өнер колледжі» МКҚК Қасенғалиева Перизат Қайратқызының оқу орнына 2006-2007 оқу жылы «Хорда дирижерлік ету» мамандығы бойынша 1-курсқа қабылданғанын мәлімдеді. Кейін 2008 жылы Алматы қаласындағы Ж.Елебеков атындағы Эстрада-цирк колледжіне ауысып кеткен.

Алайда оның басқа оқу орнына не себепті ауысып кеткенін айтудан бас тартты. Екі оқу орнында да Перизат Қайрат бір жыл, бір жылға жетпейтін уақыт оқыған. Сондай-ақ Ж.Елебеков атындағы Эстрада-цирк колледжі Перизат Қайраттың оқудан шығып қалғанын растады.

«Колледж мұрағатынан Перизат Қайрат (Қасенғалиева) туралы келесі мәліметтер табылды. Қасенғалиева Перизат – 2008 жылы ақпан айының екінші жарты жылдығынан бастап, Маңғыстау өнер колледжінен ауысуына байланысты 1-курс «Жеке ән салу” бөліміне бюджеттік оқу түріне қабылданған.«Жеке ән салу” бөлімінің 2-курс студенті Қасенғалиева Перизат 2008 жыл қазан айының 24-нен бастап өз еркімен оқудан шығарылған. П. Қасенғалиеваға академиялық анықтама берілген», – деп мәлімдеді колледждің баспасөз қызметі.

Айта кетейік, желіде Перизат Қайратпен бірге бұрын бір колледжде оқыдым деген бейтаныс қыздың видеосы тарады. Ол өзінің эстрада-цирк колледжінде Перизат Қайратпен бірге оқығанын алға тартты. 

«Сол кезде Ақтаудың колледжінен 2-курсқа Қасенғалиева Перизат деген қыз ауысып келді. Бір жарты жылға жетпейтін аз уақытта оның артынан жатақханада телефон, камераларды ұрлап, соның ақшасымен күн көретіні туралы әңгіме тарады. Ол қызды кейін тіпті оқудан шығарып жіберді. Кейде сол қыз қайда кетті екен деп ойлайтын едім», – деді ол видеода.

Ж.Елебеков атындағы Эстрада-цирк колледжі желіде тараған ұрлыққа қатысты ақпаратты жоққа шығарды.  

«Колледж мұрағатында П.Қасенғалиеваның ұрлық жасағаны үшін оқудан шығарылғаны туралы мәліметтер жоқ», – делінген жауапта.

Еске салсақ, бұған дейін ерікті Перизат Қайрат су тасқынынан зардап шеккендерге жиналған 1,5 миллиард теңгені жымқырды деп күдікке ілінген болатын. Ведомство оның заңсыз әрекетінің тағы бір эпизоды анықталғанын алға тартты. Ол Палестинаға жиналған қаражаттан тағы 200 миллион теңге жымқырған. Осылайша Перизат Қайрат 2 айға қамауға алынды.