Желіде шымкенттік кәсіпкердің есек сойып, базарға сатып жатқаны туралы ақпарат тарады
Кейбіреулер айғыр есектің қазысын жеп мәз болып жүрген шығар. Әй, Құдайдан қорықпайтындар-ай!
![Желіде шымкенттік кәсіпкердің есек сойып, базарға сатып жатқаны туралы ақпарат тарады](https://sadaqmedia.kz/uploads/images/202405/image_870x_66435231492b0.jpg)
13 мамыр күні әлеуметтік желіде Шымкентте кәсіпкерлердің бірі сапалы ет жеткізу үшін іріктелген есектерді союға жібергені туралы ақпарат тарады. Желіде қала тұрғыны кәсіпкердің арам малды сойып, етін базарда сатып жүргенін айтты. Ол мал етіне ветеринариялық инспекция пен құзырлы органдардың рұқсаты жоқ екенін айтып, наразылық білдірді, деп жазады sadaqmedia.kz ақпарат порталы stan.kz сайтына сілтеме жасап.
Шымкенттік ер адам қала маңында сойылған малды сақтайтын тиісті орын жоқ екенін және ол жерде мүлдем тазалық сақталмағанын айтты.
"Ал енді, міне, қараңыздар. Мынау Құрсай жақта, көмір жақта қаншама есек жүр. Бұл есектер не істеп жүр? Мынау жерден малдарға, яғни есектерге тамақтың қалдықтарын, жуындыны береді. Бәрін істеп қойған. Аурудың бәрі қайдан тарайды? Осы жерден тарайды. Қазір мұның ішінде бір ғана рефержуратор істеп тұр. Қазір участковый шақырдық, келсін. Одан бөлек 102-ге де хабарластық. Медициналық инспекция пен ветеринар инспекциясын шақырып жатырмыз", – деді қала тұрғыны.
Айта кетейік, рефрижератор – сойылған мал етін сақтайтын тоңазытқыш.
Сонымен қатар оқырман есектің сирақтары мен ішектерін қала маңындағы шұңқырдан тауып алғанын айтты.
"Шұңқырдың ішінде сойылған есектердің қарны, ішектері, сирақтары жатыр. Міне, сіздерге дәлел. Бұдан қалды канализация сасып тұр. Өздеріңіз көріп тұрғандай мал сойылып жатыр. Кейбіреулер айғыр есектің қазысын жеп мәз болып жүрген шығар. Әй, Құдайдан қорықпайтындар-ай!", – деді шымкенттік ер адам.
Шымкент әкімдігі оқиғаның Тұран ауданындағы Құрсай көшесі маңында болғанын растады.
"Ауыл шаруашылығы министрлігі ветеринариялық бақылау және қадағалау комитетінің аумақтық инспекциясы, ауыл шаруашылығы және ветеринария департаменті қызметкерлерінің оқиға орнына комиссиялық бару барысында Шымкент ветеринариялық станциясы, Тұран ауданының жергілікті полиция қызметі тіркелмеген шаруа қожалығында 104 бас есек пен 36 бас уақ мал ұстайтынын анықтады (иесінің айтуы бойынша)”, – делінген хабарламада.
Сонымен қатар мал иесінің сөзінше, 12 мамырда 3-4 өлген есек қожалықтың ауласында сойылып, көмілген. Сойылған есектердің етін сату фактілері анықталмады. Мал иесі есектерді Қытайға ет экспорттау мақсатында өсіргенін атап өтті.
"Жоғарыда аталғандарға байланысты ветеринариялық бақылау және қадағалау комитетінің аумақтық инспекциясымен Әкімшілік құқық бұзушылық туралы кодексінің 406-бабына сәйкес меншік иесіне әкімшілік жазамен қатар, "Ветеринария туралы" заңның 25-бабы бойынша айып тағайындалды. Осылайша Шымкент полиция департаменті шаруа қожалығының иесіне шаһар аумақтарын абаттандыру ережелерін бұзғаны үшін ӘҚБтК-нің 505-бабына сәйкес айыппұл тағайындады", – деді Шымкент әкімдігінің баспасөз қызметі.
Сіздің реакцияңыз қандай?
![like](https://sadaqmedia.kz/assets/img/reactions/like.png)
![dislike](https://sadaqmedia.kz/assets/img/reactions/dislike.png)
![love](https://sadaqmedia.kz/assets/img/reactions/love.png)
![funny](https://sadaqmedia.kz/assets/img/reactions/funny.png)
![angry](https://sadaqmedia.kz/assets/img/reactions/angry.png)
![sad](https://sadaqmedia.kz/assets/img/reactions/sad.png)
![wow](https://sadaqmedia.kz/assets/img/reactions/wow.png)