«Харассментті басынан өткергендердің бірімін»: Әріптесіне қырындаған экс-депутат Асқар Садықовтың қызы дауға қатысты пікір білдірді

Dequine лақап атымен танымал әнші Данеля Садықова әкесі Асқар Садықовқа қатысты дау бойынша пікір білдірді, деп хабарлайды inbusiness.kz сайты.

«Соңғы күндері көп жаңалық шықты, оқиғалардың қалай өрбігені өздеріңізге мәлім. Менің әкем Асқар Садықов жұмыс орнында харассмент жасады деп айыпталды. Сіздер сияқты мен де болып жатқан оқиғаларға қатты есеңгіреп қалдым. Шынтуайтына келсек, не айтарымды да білмеймін. Не істеу керектігін, кімге сену керектігін және мұндай жағдайда қалай әрекет ету керегін білмеймін. Өмір мені мұндай жағдайға дайындамады. Харассментті басынан өткерген адам ретінде болған оқиға үлкен стресс», - деп жазды әнші Instagram парақшасында.

Тағы оқыңыз: «Мен енді үнсіз қалмаймын»: Қызға қырындаймын деп Мәжілістен қуылған Садықов мәлімдеме жасады

Данеля Садықованың сөзінше, бұл жағдайдың бәрі оның өміріндегі екі негізгі құндылыққа, яғни отбасына және әйелдердің қол сұғылмаушылық құқығына әсер етті.

«Мен бірнеше жыл бұрын харассментке және зорлық-зомбылықтың барлық түріне қарсы шыққанымды, қазір де сол ұстанымдарға адал екенімді жеткізгім келеді. Мен зорлық-зомбылықтың кез келген көрінісін айыптаймын. Осындай қиын кезеңде қолдау білдіріп, жанашырлық танытып жатқандарға рақмет. Сіздердің қолдауларыңыз мен үшін маңызды», - деді Dequine.

Айта кету керек, осыған дейін депутаттықтан алынып тасталған Садықовқа қатысты тың мәлімет шыққанын жазған болатынбыз.

«Ақ жол» партиясының төрағасы Азат Перуашев әріптесі «өкілеттігін асыра пайдаланған, этикалық нормаларды бұзған» деп мәлімдеді. Өз кезегінде депутат мәртебесінен айырылған Асқар Садықов мәлімдеме жасап, Азат Перуашевтың сөздерін жоққа шығарды. 

29 тамыз күні Орталық сайлау комиссиясы «Ақ жол» партиясының ұсынуымен Мәжіліс депутаты Асқар Садықовты мандатынан айырған.