Қостанайда бұрынғы әкімнің мейрамханасы аукционға қойылды (ВИДЕО)

Қазан 28, 2024 - 17:35

Коллаж: ulysmedia.kz

Қостанайдың бұрынғы әкімінің мейрамханасы бірнеше жылдан бері аукционда сатылмай тұр - деп жазады Sadаqmedia.kz ақпарат порталы Tengrinews.kz материалына сілтеме жасап.

Қостанайдың бұрынғы әкімі Ахмедбек Ахметжановтың мейрамхана кешені қайтадан сатылымға шығарылды. Аукцион туралы хабарландыру электрон сауда алаңында пайда болды. Ауданы 1558,4 шаршы метр ғимарат 307 397 500 теңге бағамен аукционға шығарылған.

Электрон сауда алаңы сайтында көрсетілген ақпарат бойынша, сауда 2024 жылдың 13 қарашасында сағат 10:00-ге жоспарланған. Сауда-саттыққа қатысушылар үшін кепілдік жарна 92 219 250 теңге болады. Ақпарат бойынша, бір қатысушыға да сатуға рұқсат етілгені көрсетілген.

Нысан Қостанай облысында Екатеринбург – Алматы тасжолы бойында орналасқан. Ғимарат 2014 жылы 0,1916 гектар жер телімінде салынған.

Биылғы мамырда мүліктің сметалық құны 614 795 000 теңге болды. Қазір ғимарат аукционға шығарылып, құны екі есеге жуық төмендеген.

Хабарландыру бойынша, ғимарат "Қостанай облысы әкімдігінің кәсіпкерлік және индустриалды-инновациялық даму басқармасы" мемлекеттік мекемесінің балансында.

Айта кетейік, Қостанайдың бұрынғы әкіміне тиесілі "Алтын-Саф" мейрамхана кешені 2016 жылы бастапқы бағасы 429 миллион 428 мың теңгеден сатылымға шығарылған болатын. Бірақ мүлік сатылмаған.

2023 жылдың қараша айында ғимарат бастапқы бағасы 805 529 000 теңгемен қайтадан аукционға шығарылды. Аукцион тағы сәтсіз өтті.

Еске салайық, Ахметбек Ахметжановқа қатысты қозғалған қылмыстық іс аясында Қостанай қаласының экс-әкімінен мейрамхана кешенінің ғимараты тәркіленген. 2016 жылдың сәуірінде Қостанайдың бұрынғы әкімі Ахмедбек Ахметжанов 13 жылға сотталды.