«Мүшесінің рахаты үшін»: Жеңіс Ысқақова тоқал алғыш, ойнас ұстағыш шенеуніктерді биліктен қууды ұсынды

Әнші, Қазақстанның еңбек сіңірген қайраткері Жеңіс Ысқақова Adal Adam YouTube арнасына берген сұхбатында ойнас жасайтын, тоқал алатын шенеуніктерді биліктен аластатып, жазалауды ұсынды, деп хабарлады Sadaqmedia.kz ақпарат порталы.

«Тоқал алған еркек өзін өмір бақи жас боп тұрам деп ойлай ма екен?! Кішкентайынан үлкен махаббатпен үйленіп, туғызған балаларының тағдыры не болады?! Олар қандай психологиялық “травмамен” өседі? Ұл-қыздарының ішінде қандай күйзеліс бар, оны ойламайды. Қазір тоқалдардың, тоқалдан туғандардың дәуірі жүріп тұр. Бұл жігіттер тоқал аламын, қатын аламын деп, ұрпақтың психологиясын бұзып, ұрпаққа, ұлтқа қиянат жасап жатқандарын түсінбейді.

Содан ертең қызғаншақ, бір-бірін көре алмайтын, сорлы халық қалыптастыратынында жұмыстары жоқ. Бір мүшесінің рақаты үшін бүкіл ұрпаққа қиянат жасап жатқандарын біле ме екен?! Совет үкіметі кезінде әйелінің көзіне шөп салғандарды партиядан шығаратын, жұмыстан шығаратын. «Сен отбасыңа, жұмыс істеп жатқан ұжымыңа кір келтірдің, басыңды алып жүре алмадың, сен тәннің жетегінде кетіп қалдың. Сендей адам мына ұжымда жұмыс істей алмайды, сендей адам дұрыс ақыл бере алмайды» деп қаралап, қуғынға ұшырататын. Ал қазір бізде осы заңды қолға алмайынша, ештеңе тоқтамайды. Сондықтан да бүгінгі күні біздің Үкіметтегілер, депутаттар тоқал алса, ойнас жасаса, табыңыздар да, барлығын ит қосып қуу керек. Осыны министр, әкімдерден бастау керек. Барлығын тырқыратып қуыңыздар. Өз отбасын тастап кетіп, басқа жақтан қызық іздеген әкім елмен қалай жұмыс істейді? Кімге ақыл айта алады?!» — деді әнші.