Экология министрлігі киіктерді аулауға рұқсат беретін мерзімді ұсынды 

Ашық нормативтік-құқықтық актілер сайтында «Аң аулау қағидаларын бекіту туралы» бұйрықтың жобасы талқылауға шықты, деп хабарлайды sadaqmedia.kz.

Экология және табиғи ресурстар министрлігі Орман шаруашылығы комитеті талқылауға шығарған жобада киіктерді атуға рұқсат беру мерзімі көрсетілген.

«Киікті сақтау бойынша қабылданған шаралардың нәтижесінде бүгінгі күні олардың саны 1,9 млн басқа дейін жетті, олардың оңтайлы саны 770 мыңға дейін. Қазақстанның биоалуантүрлілігін сақтау қауымдастығы әзірлеген биологиялық негіздемеге сәйкес, жыныс құрамы мен мекендеу ортасына қарамастан, киікті аулау мерзімін 1 қазаннан 15 қарашаға дейін белгілеу ұсынылды», - деп жазылған талқылау жобасында.

Құжат 9 қарашаға дейін осы сайтта талқылауда тұрады. Азаматтар өздерінің электронды қолтаңбасы арқылы сайтта осы мәселеге қатысты пікір білдіре алады.