«Балқаш Жылу» директорының бұрынғы орынбасарының ісі: 3 бөлмелі пәтер мен Lexus тәркіленді
Балқашты жылытуға бөлінген 708 млн теңгені жымқырған.
«Балқаш Жылу» ЖШС директорының бұрынғы орынбасары және кәсіпорынның бас бухгалтері бюджет қаражатын ұрлағаны үшін сотталды, деп хабарлайды Sadaqmedia.kz.
Аталған азаматтарға қатысты қылмыстық істі ҚР Қаржылық мониторингі агенттігі тергеп-тексерді.
«Сотталған азаматтар 2020 жылғы маусым мен 2023 жылғы қаңтар аралығында Балқаш ЖЭО мен Балқаш қаласын жылумен жабдықтау желілерін жөндеуге және жұмысын үздіксіз қамтамасыз етуге арналған бюджет қаражатын іс жүзінде қандай да бір азаматтық-құқықтық мәмілелер жасалмаған жалған кәсіпорындардың шоттарына негізсіз аудару жолымен ұрлаған. Жалпы сомасы 708 млн теңге болатын ұрланған қаражат оны пайдаланудан кіріс алу үшін жылжымайтын мүлікпен мәмілелер жасау арқылы заңдастырылды», - делінген ҚМА ақпаратында.
Тергеу барысында күдіктілер 144 млн теңгені қайтарды. Мемлекет кірісіне 3 бөлмелі пәтер мен Lexus автокөлігі тәркіленді. Кінәлі адамдарды сот 5,5 жыл және 5 жылға бас бостандығынан айырды. Сот үкімі заңды күшіне енген жоқ.
Сіздің реакцияңыз қандай?
