«7 баланың әкесі». Түркістан тұрғыны гуманитарлық көмек жіберіп жатқанда мерт болды

Өте мейірімді кімге көмек қажет болса қол ұшын созуға асығып тұратын азамат еді.

Сәуір 16, 2024 - 17:29

Сәуір 16, 2024 - 17:30

«7 баланың әкесі». Түркістан тұрғыны гуманитарлық көмек жіберіп жатқанда мерт болды

Фото: журналист Диас Нұрақынның Facebook парақшасынан

Атырауға гуманитарлық жүк артып жатқанда қайтыс болған азаматты жерлеу рәсімі өтті, - деп жазады sadaqmedia.kz ақпарат порталы.

Түркістан облысының тұрғыны Қайырбек Әлімбекұлының артында жары мен 7 баласы, мүгедек інісі қалған. Ол туралы журналист Диас Нұрақын жазды.

"13.04 күні Атырауға көмекке аттанғалы жатқан бауырымыз Хово жүк көлігін вагонға артып жатқанда оқыстан көлік доңғалағы вагоннан тайып кетіп, өз көлігінің астында қалып қойып 7 баланың әкесі 37 жасар Қоспанов Қайырбек Әлімбекұлы деген бауырымыз марқұм болды. Бала күнімнен бірге өскен әрі көршім әрі досым еді. Өте мейірімді кімге көмек қажет болса қол ұшын созуға асығып тұратын азамат еді. Соңғы іс әрекеті де елі үшін көмекке асығу болыпты. Көмекке аттанар алдын өте қуанышты халде болып жүр еді, жақсы тілектер айтып шығарып салып едік, амал нешік жете алмады", - делінген журналистке келген хатта.

Ынталы ауылының тұрғыны Қайырбек Әлімбекұлын жерлеу рәсімі бүгін өтті. Марқұмның жолдасы Сара есімді келіншек 7 баламен жесір қалғанын айтады.

"Бүгін жерледік. Қолымда екі қайным бар. Біреуі үшінші топтағы мүгедек. Балаларымның үлкені 16 жаста. 10 сыныпта оқиды. Ал ең кенжем 2 жаста", - дейді.

Қазір жергілікті журналистер отбасына арналған қор ашып, қаржылай көмек көрсетуде.